കപട മതേതരത്വം കേരളത്തിനു ശാപമോ?

രണ്ടാമതും, അബ്ദു നാസര്‍ മദനി ജയിലില്‍ ആയിട്ട് രണ്ടു വര്‍ഷം പിന്നിടുകയാണ്. അദ്ദേഹം ജയിലില്‍ നിന്ന്‍ മരണപ്പെട്ടാല്‍ (അങ്ങനെയാകതിരിക്കാന്‍ വേണ്ടി പ്രാര്‍ത്ഥിക്കാം) പിറ്റേന്ന് പത്രങ്ങളില്‍ നിറയെ കപട മതേതരവാദികളുടെ മനുഷ്യാവകാശ പ്രതിഷേധങ്ങള്‍ കൊണ്ട് മുഖരിതമായിരിക്കും. എന്നാല്‍ ജീവിച്ചിരിക്കുമ്പോള്‍ കേരളത്തിലെ കപടമതേതരവാദികള്‍ ആയ മുസ്ലിം നാമധാരികള്‍ പോലും മദനിക്കെതിരെ ഒരു വാക്ക് പറയാന്‍ പേടിക്കുന്നു. അവരുടെ മതേതര മുഖംമൂടി അഴിഞ്ഞു വീഴുമെന്നു അവര്‍ ഭയക്കുന്നു.

മദനിയെ ജയിലില്‍ ആക്കിയവര്‍ക്ക്‌ വ്യക്തമായ ഒരു അജണ്ടയുണ്ട്. അദ്ദേഹത്തെ ജയിലില്‍ തന്നെ ഇല്ലായ്മ ചെയ്യുക. ആ ആഗ്രഹം സഫലമാകുമെങ്കിലും, ആ പാവത്തിന്‍റെ മരണത്തോട് കൂടി കേരളത്തിലെ എല്ലാ പാര്‍ട്ടികളുടെയും പ്രശ്നങ്ങള്‍ പരിഹരിക്കുമോ എന്നു കൂടി ബന്ധപ്പെട്ടവര്‍ ആലോചിക്കുന്നത് നന്നായിരിക്കും.

സ്വന്തം നേതാവ് ജയിലില്‍ ആയിട്ട് ഐക്യത്തോടെ അദ്ദേഹത്തിനു വേണ്ടി ശബ്ദം ഉയര്‍ത്താന്‍ അദ്ദേഹത്തിന്‍റെ പാര്‍ട്ടിക്ക്‌ ആകുന്നില്ല. തന്നെയുമല്ല കോയമ്പത്തൂരില്‍ പത്ത്‌ വര്‍ഷത്തിലധികം നിയമ പോരാട്ടം നടത്താന്‍ വേണ്ടി മുന്‍പന്തിയില്‍ ഉണ്ടായിരുന്ന മദനിയുടെ ബാപ്പ, രോഗശയ്യയില്‍ കിടക്കുന്നു. ഭാര്യക്കാണെങ്കില്‍ സ്വന്തം ജില്ല വിട്ടു എവിടെയും പോകാനും നിയമം അനുവദിക്കുന്നില്ല. ഇത്തരത്തില്‍ ആസൂത്രിതമായി ബന്ധനസ്ഥനാക്കാന്‍ മാത്രം എന്ത് പാതകം ആകുന്നു ഈ വികലാംഗന്‍ നമ്മുടെ നാടിനെതിരെ ചെയ്തത് എന്നു കോടതികള്‍ക്ക്‌ പോലും സമൂഹത്തോട് പറയാന്‍ പറ്റുന്നില്ല.

അന്‍പതില്‍പരം വെട്ടുകളുമായി ഒരു മനുഷ്യന്‍ നമ്മുടെ നാട്ടില്‍ അറുകൊല ചെയ്യപ്പെട്ടപ്പോള്‍ നാം എല്ലാവരും ഉറക്കെ കരഞ്ഞു ക്കൊണ്ടിരിക്കുന്നു. എന്നാല്‍ അതുപോലെയുള്ള ആയിരം മുറിവുകള്‍ മാനസികമായി നല്‍കിക്കൊണ്ട് ഒരു വ്യക്തിയെ “കൊടുംഭീകരന്‍” എന്ന തസ്തികയില്‍പ്പെടുത്തി ഏകാന്ത സെല്ലില്‍ ഇട്ടു ഇഞ്ചിഞ്ചായി  പീഡിപ്പിക്കുന്നതിനു  ആര് , ആരോടാണ് മറുപടി പറയുക. നമ്മുടെ മൗനം  അതിഭീകരമാണ്. നാം നമ്മുടെ മൗനം വെടിയേണ്ട കാലം അതിക്രമിച്ചിരിക്കുന്നു. ഓരോ മലയാളിയും ഇതിനെതിരെ പ്രതിഷേധിക്കാത്ത കാലത്തോളം മദനി ജയിലില്‍ മരണപ്പെട്ടാല്‍ നാം ഓരോരുത്തരും ആ മരണത്തിന്  ഉത്തരവാദികളായി മാറും എന്ന വസ്തുത നമ്മെ പ്രതികരണത്തിന്റെ കൊടുംകാറ്റ് ഉയര്‍ത്താന്‍ പാകത്തില്‍ പ്രാപ്തമാക്കെണ്ടതുണ്ട് .